GENERAL SANTOS CITY – Nagpaklaro si Noel Nacion kalabot sa gipahigayon miaging semana nga Run After Contribution Evaders kon RACE, kung asa gi-raid sa SSS ang siyam ka mga establisyimento sa siyudad.
Kini human nga may mga nagkanayon nga mga gagmay’ng mga establisyimento lamang ang gi-raid sa pagpanguna sa mga opisyal gikan sa Kauluhan.
Matud ni Nacion, usa ang GenSan sa mga labing unang siyudad sa Pilipinas nga gapahigayon sa maong aktibidad.
Siyam ka mga establismento lamang usab matud pa ang ilang naadtuan gumikan sa duha ka oras lamang nga operasyon.
Samtang kadtong mga dagkong kompanya ang aduna na matud pay gatutok nga mga account officers nga in-charge.
Dungan niini, giangkon ni Nacion nga daghan sa mga employers nga dili insakto ang pagremit sa SSS contributions sa mga miyembro, samtang adunay ubang mga empleyado nga walay SSS.
Nasayran nga human sa gihimo nilang raid, sagad sa ilang mga nadiskubrehan mao ang mga employer nga wala giparehistro sa SSS ang ilang mga empleyado o kaha dili tanan sa ilang mga empleyado ang nakarehistro.
Ang mga employer matud pa nga may nakita nga paglapas ang manduan nga mag-comply, ug kon magmagahi, mag-atubang ug paigong kriminal nga kaso.
