GENSAN – Na-rescue dinhi sa siyudad ang usa ka 9-anyos nga bata nga matud biktima sa pagpangidnap gikan sa Antipas, North Cotabato.
Kini human nga usa ka residente nga gikan sa nasampit nga lugar ug ania karon sa siyudad, ang nakaila sa maong bata nga nagpailang si Jonathan Galan Jr.
Sa pakighinabi sa Bombo Radyo sa nahisgutang bata, gibutyag niini nga samtang gabaktas siya sa ilang lugar ug pauli gikan sa tulunghaan dihang kalit may mihunong nga pula nga van ug gipasakay siya ug gitaptapan ang iyang mata.
Naka-bonnet matud pa ug itum ang mga suspek. Gidala matud pa siya sa usa ka dakong balay kung asa nakita niya ang uban pang bata nga gidagit usab sa mga suspek.
Base matud pa sa iyang nadunggan, panglungguan sila ug ulo ug panguhaon ang ilang kidney.
Nakahigayon lamang matud pa siyag sibat dihang nakatulog ang mga nagbantay. Nabilin matud pa ang ubang bata gumikan nakagapos.
Sa karon, napadangat na matud pa ngadto sa lokal nga panggamhanan sa Antipas ang kalabot sa pagka-rescue sa 9-anyos, ug padulong na matud pa ang ilang mayor dinhi sa dakbayan aron kuhaon ang bata.
Samtang, padayong giimbestigahan sa kapulisan ang nasampit nga insidente.
