GENERAL SANTOS CITY – Gikahadlukan sa mga Konsehal ning syudad nga mahimo nang mini traysikel kung paubsan pa sa 45 inches ang sukod sa sidecar.
Kini ang pahayag ni Vice Mayor Rosalita Nuñez sa gilalisan nga sukod sa sidecar basi sa ordinance number 37 nga gihimong basihan sa pagdawatan ug franchise renewal sa Public Safety Office.
Kini human gikumpirma ni PSO Head Atty Jong Gonzales nga daghan ang gadagan nga tricycle units ning dakbayan ang nabagsak sa sukod nga 45 inches subay sa rekositos nga ilang gipatuman hinungdan nga pakyas nila ma-rekomenda aron hatagan og bag-ong Motorized Tricycle Operator’s Permit (MTOP).
Kini human giablihan sa syudad ang renewal alang sa nueve mil nga unang prangkisa nga giisyu sa syudad. Apan sa 883 nga nagsumite sa ilang papeles wala pay usa ka gatus ang nakapasa niini.
Kahinumduman sa ulahing sesyon giangkon ni Atty Gonzales nga sukad Desyembre 22 nakalabay nga tuig hangtud Septembre syete niining tuiga 883 ang nag apply apan 79 lamang ang mipasa samtang 804 kanila ang bagsak .
Basi sa ordinansa nga gihatagan ug duha ka tuig nga moratorium ang mga franchise holder nga utruhon ang sukod sa ilang sidecar kung wala kini makaabut sa 45 ka pulgada.
