GENERAL SANTOS CITY – Pormal nga kaso na lamang ang gipaabut sa pito ka mga tawo nga kustudiya sa mga otoridad human makuhaan ug mukapin 80 ka karton sa Gudang Baru sa usa ka entrapment operation nakalaby nga gabii.
Kaso nga smuggling ang atubangon nilang Alraif Amilasan 30 anyos, Morvin Kulayan 36 anyos, Normin Paddam 34 anyos, Jehar Malo 19 anyos , Burgo Matanog 25 anyos, Michael Aman, 33 anyos ug Jerry Sampulna, 38 anyos pulos mga residente sa Zamboanga City.
Gawas sa palusot nga sigarilyo nakuha usab sa mga otoridad ang usa ka unit sa wing van ug mini van.
Nakormer sa kapulisan ang pito sa usa ka balay sa VSM subdivision sa Lagao ning dakbayan human napalitan ug napulo ka rim sa imported cigarettes bugti sa P5,000 .
Dihang nasulod na ang balay didto nakita ang daghang karton sa palusot nga sigarilyo.
Matag usa ka karton adunay unod nga 80 ka rim samtang matag rim adunay 10 ka pakete.
Nasuta nga ang Gudang Baru ang gibaligya sa matag rim sa kantidad nga P2,352.00.
