GENERAL SANTOS CITY – Mukabat na sa 754 ka kaso sa dengue ang natala sa City Health Office dinhi sa dakbayan.
Matud ni Dr. Washington Loreno, labaw sa CHO, base kini sa ilang natala nga data, gikan Enero 1 hangtod Marso 4 ning tuiga, kon asa 168 percent matud pa kining mas taas itandi sa natala miaging tuig nga mukabat lamang sa 282.
Samtang, tulo na matud pa ang nakabsan sa kinabuhi tungod sa dengue sukad nagsugod ang tuig, kung asa pulos mga bata ang namatay nga biktima.
Gumikan sa padayong pag-usbaw sa kaso sa dengue, subling nanawagan si Dr. Loreno ngadto sa publiko nga manglimpyo gayud ug pangtangtangon ang mga butang nga pwedeng kapangitlugan sa mga lamok sama sa mga nakahayang nga ligid, able nga balde, ug mga tanom nga ginapondohan ug tubig, lakip na ang mga kanal, aron makalikay sa dengue.
