GENSAN-Dakong garbo sa General Santos City ang mag-igsuong badminton players nga sila Raphaelle Dinara Aguinea ug Remeil Alessandri Aguinea human nila morepresentar sa Pilipinas sa 13th Global Chinese Youth Badminton Championship 2026 nga gipahigayon sa Malaysia niadtong Agosto 1 ug 2.
Si Raphaelle nakakuha og silver medal sa Mixed Doubles Under-17 category sa maong kompetisyon. Matud ni Raphaelle, bata pa sila sa iyang igsuon nga si Remeil sa dihang nagsugod sila sa pagpraktis og badminton sa court sa Smashers. Sa sinugdan, wala pa sila kanunay mag-training ug gihimo lamang nila kini isip kalingawan.
Apan sa dihang nakasulod na sila sa mga kompetisyon, miulbo ang ilang fighting spirit ug mas nadasig sila nga magpraktis ug moapil pa sa mga torneyo. Sa ilang kompetisyon sa Malaysia, giingon ni Raphaelle nga ang pinakalisod nilang nakalaban mao ang mga atleta gikan sa Taiwan tungod sa ilang kusog ug kataas.
Apan bisan pa sa kalisod sa kompetisyon, nalipay si Raphaelle sa oportunidad nga makaduwa batok sa mga atleta gikan sa nagkalain-laing nasud, diin nakakat-on siya og bag-ong mga teknik, nakapauswag sa iyang abilidad ug nakaila og bag-ong mga higala. Samtang si Remeil, positibo usab sa iyang kasinatian sa Malaysia ug giila niya nga daghan siya og nakat-onan gikan sa mga bag-ong kaatbang.
Matud niya, usa sa iyang dalhon sa sunod nga mga kompetisyon mao ang mas kanunay nga pagpraktis ug pagdula aron padayon nga molambo ang iyang performance.
Samtang nagpadayon sila sa ilang training, gilauman nga mahimong inspirasyon ang mag-igsuong Aguinea sa mga batan-ong atleta sa General Santos City nga nagtinguha usab nga makahatag og dungog sa siyudad ug sa nasud pinaagi sa sports.
