Nagtuo si kanhi presidential spokesperson Atty. Salvador Panelo nga mahimong mosangpot sa pagkabulag sa International Criminal Court (ICC) ang pagbiya sa mga miyembro niini.
Kini human gilunsad sa Estados Unidos ang “whole-of-government campaign” aron awhagon ang ubang nasud nga mobiya sa ICC tungod sa alegasyon nga hulga kini sa nasodnong soberanya.
Gisuportahan ni Panelo ang lakang sa administrasyon ni U.S. President Donald Trump nga i-isolate ang international tribunal. Matud niya, panahon na aron mahuman ang giingong pagpanghilabot sa ICC sa mga nasud nga dili miyembro niini.
Gihisgutan usab ni Panelo ang kaso ni kanhi Presidente Rodrigo Duterte nga gidala sa The Hague, nga iyang giingong pananglitan sa ilegal nga aksyon sa ICC batok sa dili miyembrong mga nasud.
Samtang, miingon ang Malacañang nga respetado niini ang posisyon sa Estados Unidos apan nagpabilin ang Pilipinas nga nakaangkla sa kaugalingong mga balaod ug polisiya.
