MAKILALA, NORTH COTABATO– Mukabat sa pito ang napatay sa pag-araro sa usa ka 10-wheeler truck nga may karga nga sinako nga abono sa pila ka sakyanan og panimalay sa National Highway sakop sa Barangay Malasila, Makilala, Cotabato pasado alas-8 kaganihang buntag, Disyembre 5, 2024.
Kini ang gikumpirma ni PLtCol. Rolly Oranza, hepe sa Makilala PNP sa interview sa Bombo Radyo.
Sumala kang Oranza, ang nasampit nga 10-wheeler truck ang gikan sa Toril, Davao City paadto unta sa Kidapawan City apan nawad-an og brake pag-abot sa nasangpit nga lugar og tungod nawad-an og kontrol ang driver, gi-araro niini ang pila ka indibidwal duol sa Malasila Elementary School, lakip usab ang fish car, tricycle, mga motorsiklo, mga panimalay og usa ka boarding house.
Gikumpirma usab niini nga 7 katawo ang kumpirmadong dead on the spot lakip ang drayber sa 10-wheeler truck og ang usa ka kinder garten pupil.
Gigamitan og heavy equipment ang truck aron nga ma-clear sa dalan og masayran kung adunay mga indibidwal pa nga sakay sa tricycle nga giararo sa truck. Nagpadayon ang imbestigasyon sa mga otoridad sa aksidente og ang pag-ila sa mga napatay.
Gilayon usab nga ginsuspende sa mayor sa Makilala ang klase sa mga tulunghaan sa lugar human nga madamay kapatay ang usa ka estudyante.
