Nagpasalamat si Gov. Rogelio Pacquiao sa Incident Management Team sa probinsya tungod sa ilang padayon nga pagmonitor ug pagresponde human sa magnitude 7.8 nga linog nga miigo sa rehiyon.
Atol sa flag ceremony kaganihang buntag sa Hunyo 29, gibutyag sa gobernador ang pinakabag-ong datos sa kadaot nga nahatag sa kalamidad.
Sumala kaniya, mikabat na sa 37 ang kumpirmadong namatay, samtang 13 pa ang gikataho nga missing ug 262 ang nasamdan. Dugang pa nga gibana-bana nga 100,000 ka pamilya ang naapektuhan sa linog.
Sa maong ihap, 26,000 ka mga panimalay ang partially damaged ug kapin 6,400 ang totally damaged.
Giingon usab ni Gon. Pacquiao nga adunay ipahigayon nga pag-adjust sa pondo alang sa recovery plan sa probinsya sa tuig 2027 aron masuportahan ang rehabilitasyon ug pagbangon sa mga komunidad nga grabeng naapektuhan sa maong linog.
