JAS,DAVAO OCCIDENTAL- Nagpabiling pito ka tawo ang missing sa lungsod sa Jose Abad Santos, Davao Occidental, human sa pagbaha nga dala sa Bagyong Inday ug kusog nga pag-ulan.
Sumala kang Julie Marie Muda Buen sa Municipal Information Office, usa sa unang walo ka na-report nga missing ang naluwas, samtang usa usab ang naangol.
Sa pito ka nagpabiling missing, duha niini mga senior citizen. Padayon sa gihapon ang Rapid Damage Assessment and Needs Analysis nga gipahigayon sa Municipal Disaster Risk Reduction and Management Office ug Provincial Disaster Risk Reduction and Management Office aron mahibaluan ang tinuod nga gidak-on sa kadaot.
Matod ni Buen, wala pa’y nakumpirmang namatay sa maong insidente, samtang nagpadayon ang pagpangita sa mga missing ug paghatag og tabang sa mga naapektuhan.
Samtang, naablihan na pag-usab ang pipila ka mga dalan nga naapektuhan sa landslide human sa clearing operations sa Department of Public Works and Highways Region 11, ug mahimo na kining maagian sa mga sakyanan.
Wala pa usab matino sa mga awtoridad ang gidaghanon sa mga balay nga nadaot tungod kay padayon pa ang assessment sa nagkalain-laing barangay nga grabeng naigo sa baha ug pagdahili sa yuta.
