GENERAL SANTOS CITY- Gikustodiya sa Traffic Management Unit-GenSan ang usa ka ambulansya, fish car ug motorsiklo human malambigit sa karambola sa mga sakyanan, Huwebes sa hapon, kung asa pito ang nasamdan.
Sa imbestigasyon, atigayon ang insidente sa highway Makar, Brgy Labangal ning siyudad, human matud pa gibangga sa usa ka fish car ang usa ka ambulansya ug naangin pa ang motorsiklo nga gasunod niini.
Nabalian ug tiil ang driver sa ambulansya sa President Quirino nga si Dan Bryle Estalbo, nga gikan matud pa sa ospital sa Calumpang ug may gihatod nga pasyente ug pauli na unta.
Nakaangkon usab ug mga pangos ang driver sa motorsiklo nga si Rex Batal, human napasok ilawom sa ambulansya ang iyang motorsiklo.
Nakaangkon usab ug minor injuries ang driver sa fish car nga si Andres Bajinting Jr., apil na ang lain pang upat ka sakay niini nga matud pa gikan Davao ug padulong sa GenSan Fish Port.
Matud sa driver sa truck, may van nga kalit nag-menor hinungdan nga iyang gilikayan apan nagresulta hinuon sa karambola sa tulo ka sakyanan.
Sa karon padayong giimbestigahan sa TMU ang naasoy’ng aksidente, ug gilauman nga makaangkon na lamang ug aregulhanay tali sa tulo ka kampo.
