GENERAL SANTOS CITY – Gilayong milibot ang mga personahe sa City Disaster Risk Reduction and Management Council (CDRRMC) sa dakbayan sa Heneral Sanrtos human ang nasinatian nga pagtay-og kaganihang buntag.
Kini human sa magnitude 7.1 nga linog nga mitay-og sa Sultan Kudarat kaganihang alas 10:13 sa buntag, Hulyo 11, sumala sa Philippine Institute of Volcanology and Seismology (Phivolcs).
Sa talaan sa Phivolcs, nahitabo ang linog nga tectonic ang tinubdan ug nakita ang epicenter niini 133 kilometro nga anaa sa gilay-on nga habagatan-kasadpan sa Palimbang, Sultan Kudarat, nga adunay gilawmon nga 722 kilometro.
Anaa sa Intensity IV ang nasinatian sa Jose Abad Santos, Davao Occidental; Intensity III sa Mati City, Davao Oriental; Glan, Sarangani Province; Intensity II sa Maragusan, Davao de Oro; Tagum City, Davao del Norte; Libungan ug Tulunan, Cotabato; Kiamba, Maitum, ug Malapatan, Sarangani Province; Koronadal City, South Cotabato. Dinhi sa Gensan, nasiantian usab ang pagtay-og kung asa Intensity ang II ang natala. Samtang Intensity I sa Davao City, Tantangan, South Cotabato ug Lebak, Sultan Kudarat.
Nagpahimangno si Joriemae Balmediano, tigpamaba sa Office of Civil Defense Region 12 sa publiko nga mag-amping gihapon tungod sa mga aftershocks nga padayong mabatyagan human ang linog.
Sa iyang pamahayag nga dakong tabang ang ang mga ginapahigayong earthquake drill aron masayod sa himuon kung matigayon ang linog.
Sa unang gipagawas nga taho sa Phivolcs, anaa sa magnitude 6.5 nga linog ang mitay-og sa Sultan Kudarat apan gibag-o og gitaas kini sa magnitude 7.1 nga linog.
