GENERAL SANTOS CITY – Naugdaw ang PuriCulture, usa ka dako og karaang birthing home nga anaa sa likod sa City Hall ning dakbayan alas 2:45 sa kaadlawon.
Sa pakighinabi sa Bombo Radyo, gibutyag sa guwardya sa maong paanakan nga si Marlon Romero nga nakadungog kini og buto sa 2nd floor hinungdan nga giadtuan aron masusi ang panghitabo, apan nisugat kaniya ang baga nga aso og dayon mikatag na ang kalayo sa tibuok gambalay.
Hinungdan nga paspas nga gisultihan ang tanang pasyente og mga on-duty nga paspas usab nga mugawas.
Gilamoy sa dakong kalayo ang building og wala nay nasalbar nga mga gamit .
Luwas nga nakagawas ang mga bag-ong nanganak nga inahan kuyog ang ilang mga masuso apil ang mga midwife, nurse on-duty apil ang utility kaganihang kaadlawon.
Samtang may usa ka buntis nga ga-labor na unta dihang natigayon ang dakong sunog nga gidali og balhin sa lain nga ospital.
Gikabutyag ni Myla Ismael midwife on-duty nga 67 years na nagbarog ang Puriculture.
Nasayran nga nag-ulan-ulan dihang natigayon ang sunog.
