GENERAL SANTOS CITY – Mukapin na sa 670 ka mga tawo ang gituhuang namatay human natigayon ang landslide sa usa ka lugar sa Papua New Guinea, sumala sa usa ka opisyal sa United Nation.
Gibanabanaang mukapin sa 150 na ka mga balay ang nalubong gumikan sa naasoy nga kalamidad, sumala sa opisyal sa UN migration agency nga si Serhan Aktoprak.
Hangtud karon delikado gihapon ang sitwasyon tungod sa padayon nga pagkahugno sa yuta. Matud ni Aktoprak, padayon nga gabaha ang tubig nga nagresulta sa hilabihan ka peligro sa Port Moresby.
Mukapin sa 1,000 ka mga tawo usab ang nawad-an ug panginabuhi-an human nalunupan sa tubig ang mga pananum ug hingpit nabungkag.
Nawad-an usab ug suplay sa tubig ang lugar samtang gagamit na lamang ang mga residente ug digging stick, pala, mga dagko nga agricultural fork aron haw-ason ang mga patay nga lawas nga nalubong sa yuta.
