Nagtinguha ang usa ka siyudad sa Minnesota, Estados Unidos nga mailhan sa Guinness World Records ang ilang bag-ong landmark nga usa ka higanteng nutcracker nga gitawag og “Verne the Patriot.”
Ang maong higanteng nutcracker nga adunay gitas-on nga 65 feet gidisenyo sa artist nga si Katie Walgrave ug bag-o lang gibutang duol sa daplin sa siyudad sa Luverne.
Opisyal usab kining giablihan sa publiko pinaagi sa usa ka ribbon-cutting ceremony niadtong Sabado. Kabahin si Verne the Patriot sa nutcracker-themed tourism campaign sa maong lungsod nga gisugdan niadtong 2017.
Ang ideya niini giinspirar sa lokal nga residente nga si Betty Mann, 96-anyos, nga nailhan tungod sa iyang koleksyon nga adunay 7,554 ka nutcrackers. Mitambong usab si Mann sa seremonyas sa pag-abli sa higanteng nutcracker.
Ang kasamtangang Guinness World Record alang sa pinakadakong nutcracker gihuptan sa usa ka eskultura sa Germany nga adunay gitas-on nga 33 feet ug 1 inch, nga natukod niadtong 2008.
Naglaum ang City of Luverne nga makuha ni Verne the Patriot ang maong rekord tungod sa iyang 65 feet nga kataas.
