GENERAL SANTOS CITY – Mukabat na sa 615 ang natala nga aksidente sa dalan dinhi sa dakbayan ning tuiga.
Base kini sa gipagawas nga record sa Traffic Management Unit, gikan Enero hangtod Abril. Alang sa Enero, 191 ka aksidente sa dalan ang natala, samtang 167 sa bulan sa Pebrero, 187 sa Marso, ug 70 ning kasamtangang bulan.
Gikan sa nasampit nga ihap, sa kinatibuk-an 16 ka kinabuhi na ang nakalas, ug 309 ka mga katigayunan ang nadaot, gumikan sa mga nasampit nga insidente.
Labing daghan sa mga nalambigit nga sakyanan sa aksidente sa dalan mao ang motorsiklo nga may 372, gisundan sa mga kotse nga may 356, tricycle-200, truck-187, jeep-21 ug bus-unom.
Ug ang sagad nga rason mao ang over speeding kon hilabihang kapaspas nga pagpadagan.
Gumikan niini, kanunay ang hugot nga pahimangno sa mga otoridad nga mag-amping gayud sa pagmaneho, likayan ang pagmaneho nga naka-inom, aron malikayan ang bisan unsang aksidente sa dalan.
