GENSAN- Ginasuta pa sa mga otoridad ang gigikanan sa usa ka 60 millimeter mortar nga nakaplagan sa usa ka garbage collector sa Purok 5, Rajah Muda, Barangay Bula, alas 9:00 sa buntag kagahapong adlawa, Pebrero 10.
Sumala kang Police Master Sergeant Ace Laurence Delfin, Admin-PMSO, ang maong eksplosibo anaa na karon sa kustodiya sa General Santos City Explosive Ordnance Disposal and Canine Unit (GSC-ECU) alang sa hustong pagdumala ug disposal.
Ang Bula Police Station maoy unang nakadawat sa report ug nakig-alayon dayon sa GSC-ECU human nga giturnover sa garbage collector ang maong mortar.
Matud pa, kini nakabutang sulod sa usa ka sudlanan nga gisulod usab sa sako ug nasagol sa mga basura. Sa inisyal nga pagsusi sa kapulisan, posible nga ang naglabay sa mortar wala magtinguha og pagpanghadlok kondili gusto lamang kini i-dispose.
Bisan pa man, padayon ang imbestigasyon aron mahibaluan kung asa kini gikan ug paunsa nakaabot sa maong lugar.
Dugang ni Police Master Sergeant Delfin nga adunay storage area ang ilang buhatan alang sa mga eksplosibo ug ordnance nga makaplagan sa dakbayan.
Apan tungod sa peligro nga dala sa maong klase sa butang, gikinahanglan nga ma-dispose dayon kini sa husto ug luwas nga paagi.
