GENERAL SANTOS CITY – Padayon pang giimbestigahan ang paglugos sa usa ka 60 anyos nga biyuda sa Glan, Sarangani Province.
Giila lamang ang biktima nga si Lola Insyang nga residente sa maong lugar. Matud sa usa ka silingan, gitabangan nila ang maong senior citizen nga ipailawom sa medical examination.
Gibutyag niini, nag-inom ang mga silingan kauban ang suspek nga nagpangidaron og 40-anyos og gipainom si Lola Insyang hinungdan nga nahubog.
Samtang, nag-inum, sikreto matud pang gidala sa suspek sa ilang balay si Lola Insyang og didto natigayon ang paglugos.
Apan nasundan sa usa ka silingan ang suspek nga maoy nakakita sa paglugos sa tigulang.
Gilayon niining gisumbong ngadto sa anak ni Lolo Insyang ang nahitabo sa iyang inahan hinungdan nga giadtuan sa anak ang balay sa suspek og didto nakakita mismo sa iyang mata nga wala nay gisul-ob pang-ilalom ang inahan.
Basi usab sa mga gipanulti sa higalang babaye ni Lola Insyang sa ilang lugar nga duha ka higayon matud pang gihilabtan sa suspek ang edaran.
Gipaabot pa sa pamilya ang resulta sa gihimong medical examination kay Lola Insyang aron magpasaka og kaso batok sa suspek nga nagpabilin pang gawasnon hangtud karon.
Duda ang pamilya nga adunay gihimong pagmaniobra sa unang resulta sa gihimong pagsuta kay Lola Insyang human nga nagnegatibo hinungdan nga gipailawom pag-usab sa pagsuta dinhi sa dakbayan.
Gikabutyag nga gikan matud pa sa iladong pamilya og daghan matud pay koneksyon sa Glan ang suspek.
