Unom ang kumpirmadong patay samtang liboan ang napugos nga mabiya sa ilang mga panimalay tungod sa grabeng pagbaha nga miigo sa habagatang-kasadpang bahin sa China, ilabina sa lalawigan sa Guizhou
Sumala sa report sa state media, kapin sa 80,000 ka residente ang nabakwit human ang tubig baha misaka og kalit sukad niadtong Martes, nga miigo sa mga lungsod sa Rongjiang ug Congjiang.
Ang tubig baha gikan sa Guizhou mikatag padulong sa ubang lugar sa rehiyon sa Guangxi, diin daghang kabaryohan ang halos gitunga sa baha, ilabina kadtong anaa sa palibot sa **Liu River. Gipaabot pa nga mosamot ang kadaut sa pagsaka sa tropical cyclone karong Huwebes.
Giila sa China Central Television (CCTV) nga “eksepsyonal” ang kalig-on sa baha nga miigo sa nasud, ug padayon nga gi-monitor sa mga otoridad ang posibilidad sa dugang kadaut.
Samtang nabaha ang habagatang bahin, nagpagula usab og heat alert ang mga otoridad sa Beijing, nga nakasinati sa usa sa pinakainit nga mga adlaw karong tuiga.
Sa laing bahin, libo-libo usab ang nabakwit sa Hunan province niadtong miaging semana tungod sa kusog nga ulan.
Nagpadayon ang paningkamot sa mga otoridad sa paghatag og ayuda ug pagpanalipod sa mga naapektuhang komunidad samtang gipaabot ang posibleng dugang nga kalamidad.
