Patay ang labing menos unom ka tawo ug 26 ang nasamdan sa sunod-sunod nga pag-atake sa Russia sa Ukraine, usa ka adlaw human sa pag-atake sa usa ka shopping complex.
Sa Kyiv, usa ka tawo ang namatay human maigo sa ballistic missile attack sa Russia ang usa ka bodega sa Darnytskyi district. Samtang sa Kherson Region, tulo ang namatay ug 13 ang nasamdan human maigo sa mga balay ug apartment building ang mga pag-atake.
Sa Donetsk Region, usa ang namatay ug pito ang nasamdan, lakip ang lima sa lungsod sa Kramatorsk. Sa Sumy Region, usa ka lalaki ang namatay human maigo sa drone attack ang usa ka balay.
Samtang sa Kherson City, nasunog ang usa ka shopping centre tungod sa drone strike apan wala’y nasamdan o namatay.
Sa laing bahin, duha ka bata ang namatay ug duha ka hamtong ang nasamdan human giingong naigo sa Ukrainian drone ang usa ka balay sa Krasnodar Region sa habagatang bahin sa Russia.
Nagpadayon usab ang rescue operation sa Kryvyi Rih, diin gipangita sa mga emergency worker ang posibleng mga biktima sa pagkasunog sa Sunny Gallery shopping complex human sa pag-atake niadtong Biyernes.
