GENERAL SANTOS CITY – Giandam na sa National Bureau of Investigation (NBI) ang kaso batok sa unom ka negosyante nga nadakpan nga nagbaligya ug mga iligal nga pinutol nga mga kahoy.
Kini human gi-raid sa mga operatiba sa NBI kauban ang DENR ang naglinya nga mga tindahan sa kahoy sa Makar, Brgy Labangal ning dakbayan.
Gilusad ang maong operasyon human magpositibo ang gipahigayong buy-bust sa NBI batok sa mga tindahan nga nagbaligya ug hardwood o mga naturally-grown trees nga gibawal putlon base sa balaod.
Mukabat sa 25,113 board feet sa Lawaan, Apitong, Molave ug Yakal ang nakumpiska sa mga otoridad gikan sa unom ka mga tindahan.
Gihingusgan usab sa mga tag-iya nga igo lamang ginabagsak kanila ang nahisgutang mga kahoy.
Kahibaluan nga gibawal ang pagputol sa mga naturally-grown trees ilawom sa gipatuman nga total log ban base sa Executive Order No. 23 ug Forestry Law 705.
