GENERAL SANTOS CITY – Kasamtangan nang anaa sa kustodiya sa City Social Welfare and Development Office ang usa ka 17-anyos nga lalaki nga gireklamo sa pagpangmolestiya sa 6-anyos nga batang lalaki.
Kini ang gikumpirma sa Bombo Radyo ni Police Chief Inspector Prtich Elma, hepe sa Makar Police Station, human matud pa masikop ang menor de edad nga suspek.
Una niini, base matud pa sa imbestigasyon, gibilin kadali sa iyang lola ang biktima ngadto sa suspek, aron may asikasuhon sa usa ka resort sa siyudad.
Apan sa pag-uli sa apuhan, nagsumbong matud pa iyang apo kalabot sa gihimo sa suspek kaniya.
Gikabutyag nga gidulaan sa suspek ang pribadong bahin sa lawas sa bata, ug gi-oral sex.
Gumikan niini, gilayon nilang gireport sa mga pulis ang insidente, ug nasikop ang suspek nga usa matud pa ka miyembro sa mga gikonsiderang children in conflict with the law ug may record sa nasampit nga presinto.
