GENSAN- Nakasinati pag-usab og kusog nga pagtay-og sa yuta ang pipila ka bahin sa Mindanao human marekord ang magnitude 6.6 nga linog alas 5:18 sa hapon ning adlawa, Hunyo 15.
Nasinatian ang Intensity III sa General Santos City ug ubang bahin sa South Cotabato, sumala sa Philippine Institute of Volcanology and Seismology.
Nahimutang ang sentro sa linog sa 164 kilometro habagatan-sidlakan sa Governor Generoso, Davao Oriental ug adunay giladmon nga 86 kilometro.
Base sa instrumental intensities sa PHIVOLCS, Intensity II usab ang nabati sa Digos City sa Davao del Sur, Malungon sa Sarangani, ug sa Koronadal City ug Tupi sa South Cotabato. Samtang Intensity I ang natala sa Magsaysay sa Davao del Sur, Sta. Maria sa Davao Occidental, Nabunturan sa Davao de Oro, ug sa mga lungsod sa Kiamba, Malapatan ug Maasim sa Sarangani, ingon man sa Tboli sa South Cotabato.
Sa pagkakaron, padayon ang pagmonitor sa mga otoridad sa sitwasyon.
