GENERAL SANTOS CITY – Sa Biyernes na, Hunyo 15, matigayon ang pagsaulog sa dakbayan sa Heneral Santos sa golden o ika-50 nga charter anniversary.
Gitawag usab kini nga Metro Gensan Day, human napasa sa Sangguniang Panglungsod ang sugyot nga ang matag Hunyo 15 sa dakbayan, aron mahatagan ug bili ang maong adlaw lakip na ang katawhan sa siyudad nga maoy nagprotekta ug nag-amoma hangtod nga nahimong kung unsa na kini karon.
Giimbitahan sa City Tourism Office ang publiko nga musalmot ug mupartisipar sa mga aktibidad nga ipahigayon, kung asa matud ni Tourism Officer Cora Tito, usa ka adlaw ang kasaulugan, kung asa duha ka dakong panghitabo ang matigayon.
Matud pa, alas 5:00 sa buntag ipahigayon ang civic military parade, nga bahinon sa duha ka grupo.
Manukad matud pa ang usa sa Queen Tuna Park, samtang ang laing grupo ang maggikan sa GenSan Park.
Masaksihan usab ang 50 ka kabayo atul sa civic military parade sa pagpanguna sa Pioneers and Descendants of Paulino Santos. Pag-abot sa Plaza ng Heneral Santos, maghalad ug bulak kang Gen. Paulino Santos, dayon mulahos sa Oval Plaza kung asa ipadayon ang programa.
Pagkahapon ipahigayon ang grand anniversary ball kung asa giimbitahan ang tibuok pamilyang Chiongbian, gumikan hatagan ug post humost award si kanhi Rep. James Chiongbian, ang gikonsidera nga amahan sa siyudad.
