Nagpahibalo ang Department of Agriculture (DA) nga ang National Food Authority (NFA) nagsugod na sa pagpadala og 35,000 ka sakong well-milled rice sa Sugbo aron ibaligya sa tag P20 matag kilo nga bugas.
Matod sa DA ang barko nga nagkarga og mga sako sa bugas niabot sa Sugbo niadtong Lunes, Mayo 12, isip kabahin sa programa nga gipasiugdahan ni Presidente Ferdinand Marcos Jr.
Lakip sa mga probinsya nga mosalmot sa pilot test nga molungtad hangtod sa Disyembre mao ang Bohol, Siquijor, ug Southern Leyte, nga adunay total initial order nga 673,000 ka sako sa bugas.
Ang programa nga “Benteng Bigas, Meron Na!” gipatuman sa DA sa pakigtambayayong sa Food Terminal Inc.(FTI) ug mga lokal nga kagamhanan, diin ilang gibahin ang P13 nga subsidy sa pagbaligya sa bugas sa tag P20 matag kilo.
Gamit ang bugas nga gipalit gikan sa mga lokal nga mag-uuma, ang programa nagtumong sa pagpagaan sa gasto sa mga konsumidor ug pagsuporta sa mga mag-uuma.
P4.5 bilyones nga pundo ang gigahin alang sa pilot implementasyon, nga gipaabot nga mapalapad sa tibuok nasod hangtod sa 2028.
Sa laing bahin, nagsugod usab ang pagbaligya sa bugas nga tag P20 matag kilo niadtong Martes sa 12 ka Kadiwa ng Pangulo centers sa Metro Manila ug kasikbit nga mga probinsiya, nga molapad ngadto sa 32 ka centers sa Mayo 15.
