GENERAL SANTOS CITY – Mag-atubang gihapon sa kasong kalapasan sa Section 11 (Possession) sa Article II sa Republic Act 9165 ang tulo ka mga target sa gihimong search warrant operation nga gipahigayon sa mga otoridad sa Purok Makabimban, Kabacan, Cotabato Province aging adlaw.
Nasayran nga ang target sa Search warrant operation mao silang si Unson Baliwan Alias Kumander Omega, Paulo Baculodan Alias Pawakan ug Narcisa Baliwan aka Narcisa Baliwan Baculodan.
Matud kang Katryn Gaye Abad, Information Officer III sa PDEA 12, pakyas nga madakpan ang mga nasampit apan malampuson hinuon nga narekober ang mukabat sa 52 ka sachet sa gituohang shabu atol sa maong operasyon.
Dihang unang gisulod sa tropa sa PDEA kauban ang kapulisan ug militar ang balay sa magtiayong Paulo Baculodan ug Narcisa Baliwan apan pakyas silang madakpan human nga nakamatikod sa presensya sa otoridad.
Narekober sa balay sa mga suspek ang (45) ka gagmayng sachets sa suspected shabu nga pito ka gramo nga kantidad og P47,600.00.
Samtang sa sunod nga gipatumang search warrant, gisulod sa otoridad ang balay ni Kumander Omega nga miresulta sa pagkarekober sa (6) ka gagmay ug usa ka medium sachet sa suspected shabu nga unom ka gramo nga kantidad sa P40,800.00.
Si Kumander Omega apil sa target-listed drug personality ug usa ka MILF Commander.
Ang area sa operasyon niini sa pagpamaligya ug iligal nga droga anaa sa Cuyapon, Kabacan ug uban pang munisipalidad sa probinsya sa Cotabato.
