GENERAL SANTOS CITY – Nakadawat ug plaque of appreciation gikan sa lokal nga panggamhanan ning dakbayan ang 50 ka mga negosyo sa siyudad nga unang nakahuman sa ilang business permit.
Matud pa ni Geraldine Zamora, labaw sa City Permits and Licensing Division, kini na ang ikaduha ka tuig nga gihimo ni Mayor Ronnel Rivera ang paghatag ug pasidungog sa mga nahisgutan.
Usa matud pa kini ka pamaagi sa siyudad nga hatagan ug pagtagad ug ilhon ang mga negosyante nga unang nag-asikaso sa ilang mga business permits.
Samtang, ang labing unang nakahuman sa pagproseso ug business permit ning tuiga mao si Willy Grandeza nga may negosyo kalabutan sa martial arts nga kanunay nga wala gapaulahi.
Nasayran nga sa pagkakaron kapin sa 5,000 ka business permit pa lamang ang gipirmahan ni Zamora gikan sa kapin sa 10,000 ka mga establisyimento nga gilauman nga magparenew.
Samtang sa ning higayuna nagpadayon gihapon ang pagproseso sa uban sa ilang business permit.
