Alang sa mga Pilipino nga walay katakos nga magbayad sa pagpa-ospital, sugod Abril 4, gitangtang na sa Philippine Health Insurance Corporation (PhilHealth) ang 45-day benefit limit.
Buot pasabot, ang mga miyembro sa PhilHealth nga nanginahanglan og taas nga pagpatambal sa sulod sa ospital ang dili na mabalaka sa ilang galastuhon.
Matod ni PhilHealth acting President at CEO na si Dr. Edwin Mercado nga tumong sa maong lakang nga mahatagan og paigong serbisyong medikal ang mga Pilipino.
Sakop niini ang mga medical condition og surgical procedure nga nalangkob sa PhilHealth all case rates, Z benefits, SDG-related benefits susama sa animal bite treatment, outpatient HIV/AIDS treatment og TB-DOTS packages.
Giklaro usab sa PhilHealth, dili sakop sa bag-ong polisiya ang 156 hemodialysis session nga abagahon usab sa state insurer.
