Luwas ang tanang 44 ka bata human gipusil sa usa ka pulis ang iyang asawa nga usa ka magtutudlo sa kindergarten sa Chonburi province, Thailand ning Miyerkules.
Sumala sa mga otoridad, luwas nga gipagawas gikan sa eskwelahan ang mga bata, uban ang tulo ka magtutudlo ug tulo ka school staff, human sa insidente sa Nong Pla Lai Municipal Kindergarten sa Bang Lamung district.
Base sa report sa AFP, miabot sa eskwelahan ang suspek nga usa ka pulis ug nakigsulti sa iyang asawa sa wala pa kini gipusil. Wala makasaksi ang mga bata sa pagpamusil tungod kay nahitabo kini sa gawas sa classroom.
Human sa insidente, mibalik sa ilang balay ang suspek diin kini gipalibotan sa mga pulis samtang gihangyo nga mosurender.
Samtang, gimando sa gobernador ang temporaryong pagsirado sa kindergarten ug paghatag og psychological support alang sa mga bata ug school staff nga naapektuhan sa insidente.
Wala pa klaro ang motibo sa pagpamusil.
