Milagrosong naluwas nga buhi ang usa ka 43 anyos nga security guard human ma-trap sulod sa walo ka adlaw ilawom sa natumpag nga building tungod sa sunod-sunod nga mga linog nga miigo sa Venezuela.
Giila ang naluwas nga si Hernán Alberto Gil Flores, nga nagtrabaho isip night watch guard sa usa ka pito ka andanang shopping center.
Nagpabilin siyang luwas sulod sa iyang security booth sa basement sa building. Tungod sa kalig-on sa maong booth, naporma ang usa ka air pocket o luna nga adunay hangin taliwala sa natumpag nga estruktura, nga nakatabang aron mabuhi siya.
Nahitabo ang insidente sa Catia La Mar, usa sa mga lugar nga grabeng naapektuhan sa linog.
Kapin sa 100 ka oras ang gigahin sa mga bombero ug rescue workers aron hingpit nga makalot ug mapagawas si Gil gikan sa ilawom sa gibana-banang 140 ka tonelada nga natumpag nga semento.
Hinumdoman nga niadtong Hunyo 24, 2026, giigo ang amihanang baybayon sa Venezuela sa duha ka kusog nga linog nga may magnitudes 7.2 ug 7.5.
Hangtod Huwebes sa gabii, misaka na sa 2,595 ang kumpirmadong namatay, samtang liboan pa ang wala gihapon hingkaplagi. Busa, ang pagkaluwas ni Gil human sa walo ka adlaw giisip nga usa ka dakong milagro ug simbolo sa paglaom.
