GENERAL SANTOS CITY – Gipaniguro ni City Veterinary Office nga walay makalusot nga mga meat processed products nga gikan sa Region 11 o Davao Region.
Kahinumduman nga kapin o kulang 40 kilos o anaa sa 85 ka packs sa pork siomai og chorizo ang nakumpiska sa Tinagacan Checkpoint.
Matud pa kang Dr. Rex Calub sa City Vet nga gikan ang mga naasoyng produkto sa Maa Davao City nga gisakay sa usa ka pribadong pick up truck.
Sa iyang pamahayag nga nakalusot man sa ubang checkpoint ang maong sakyanan tungod mi-diretso sa pagpdagan apan pag-abot sa checkpoint sa Tinagacan ilang kini nga napugngan.
Hangyo ni Dr. Calub ngadto sa katawhan nga dili magpalusot og karneng baboy gikan sa nahisgutang lugar gumikan may kaso sa African Swine Fever kun ASF hangtud karon.
Nagpahimangno usab sa publiko nga dili na lang basta mupalit og karne sa baboy og pork products nga gibaligya online tungod wala masiguro kung asa gikan ang baboy og unsa nga raw materials ang gigamit.
Nasayran nga sukad sa miaging tuig nagsugod sa pagmuntar og checkpoints sa nagkadaiyang mga entry og exit points sa syudad aron masiguro nga dili makasulod sa dakbayan ang mga karne sa baboy gikan sa mga ASF infected areas.
