GENERAL SANTOS CITY – Nagkatag ang unod sa 40 ka sako sa uling human mabangga ang gisakyan niini nga top-down sa SUV nga gimanehuan ni P/Supt. Joefel Remudaro, kanhing opisyal sa Sarangani Police Provincial Office, kaganihang kaadlawon sa may Tiongson St, Brgy Lagao ning siyudad.
Giila ang driver sa topdown nga si Maximo Cabale, 36-anyos, taga-Alabel, Sarangani Province. Samtang nakaangkon usab ug gamay samad sa tuhod si Supt. Remudaro tungod sa insidete.
Sa pagsaysay sa driver sa topdown, gikan siya sa Tiongson St ug puno kaayo ang topdown sa 40 ka sako sa uling, ug muliko unta paingon sa J. Catolico Avenue, apan nakasugat ug nakabangga ang SUV, hinungdan nga nadiretso sa poste sa usa ka gasolinahan, ug nangahabwa ang mga karga nga uling.
Padayong giimbestigahan sa taga-Traffic Management Unit ang nasampit nga insidente.
Kahibaluan nga hugot ang ginapatuman nga pagbantay sa kapulisan sa Sarangani batok sa pagpanguling ug pagpamutol ug mga kahoy sa probinsya.
