Nagpadayon ang Indian Coast Guard sa ilang mga paningkamot sa pagpangita sa upat pa ka mga tripulante nga nawala human sa usa ka dakong sunog miulbo sa usa ka Singapore-flagged cargo ship sa tunga-tunga sa Arabian Sea sa baybayon sa Kerala, India.
Sa pagkakaron, 18 sa 22 ka tripulante ang naluwas sa Indian Coast Guard. Ang upat nga nawala nga mga tripulante gikan sa Taiwan, Myanmar, ug Indonesia.
Ang Singapore Maritime and Port Authority (MPA) nagpadala usab og tabang aron suportahan ang operasyon.
Ang barko gikan sa Colombo, Sri Lanka paingon sa Mumbai, India, dihang ang management sa barko nitaho nga nakadungog og kusog nga pagbuto sa usa ka container diin 50 ka container gikan sa barko ang nahulog sa dagat.
Sa laing bahin, ang Indian National Center for Ocean Information Services (INCOIS) nagpagawas ug pasidaan bahin sa posibleng oil spill ug debris gikan sa barko, nga mahimong makadaot sa kinaiyahan.
