Nagtuo ang usa ka legal strategist nga walay pagpabor ang upat ka retiradong mahistrado sa Supreme Court nga gipili sa Senate Impeachment Court isip mga legal adviser bahin sa voting threshold alang sa impeachment trial ni Vice President Sara Duterte.
Sa usa ka pakighinabi sa Bombo Radyo Iloilo kang Atty. Dan Cartagena, iyang gidayeg ang pagpili sa upat ka retiradong mahistrado tungod kay wala siya’y nakita nga higayon nga nagpahayag ang mga kini og ilang political opinion.
Lakip sa iyang giila nga respetadong personalidad sa natad sa balaod sila retired Chief Justices Artemio Panganiban, Reynato Puno ug Hilario Davide Jr., ingon man si retired Associate Justice Rodolfo Azcuna.
Gipasabot ni Cartagena nga bisan nakamatikod siya og political leaning kang Davide, nakaangkla lamang kini sa lokal nga politika ug wala naglangkit sa naglungtad nga panagbangi tali sa pamilya Marcos ug Duterte.
Gihisgotan usab niya si Azcuna nga bisan kanunay mohatag og mga panayam, pirmi niyang ipakita ang duha ka bahin sa usa ka isyu, busa klaro nga wala siyay gipakitang pagpabor sa iyang mga opinyon.
Una nang giseguro sa Senate Impeachment Court nga patas ang proseso sa pagpili sa upat ka retiradong mahistrado sa Supreme Court aron magsilbing amici curiae o “mga higala sa korte.”
Samtang, giinsister usab ni Cartagena nga kinahanglan magpabilin ang impeachment court sa probisyon sa Konstitusyon nga duha ka-katulo sa tanang miyembro sa Senado ang gikinahanglang boto aron ma-convict ang usa ka opisyal.
Dugang pa sa abogado nga puro lamang espekulasyon ang pag-ingon nga posibleng dili makaboto ang pipila ka senador nga dili makatambong sa mga pagdungog sa impeachment trial, ug dili kini mahimong gamiton isip legal nga argumento.
