GENERAL SANTOS CITY – Patung-patong nga kaso ang ipasang-at sa kapulisan batok sa nadakpan nga upat ka gituohang miyembro sa robbery gang gikan sa Davao Region human ang natigayong engkwentro sa Mabuhay Road ning syudad.
Giila ni P/Maj. Rexor Jake Canoy, tigpamaba sa GenSan City Police Office ang mga dinakpan nga silang Ariel Apatan Gubantes, 30, residente sa Kapalong, Davao del Norte, kansa samdan ang kamot nga bahin; Jose Antoque Jr.,51, residente sa Bacaca Road, Davao City, Ricky Faulve, 47, taga Barangay Pida, Panabo, Davao del Norte og Ramon Catamisan, 30 nga taga Kapalong, Davao del Norte.
Matud pa ni P/Maj.Canoy, ang upat ka suspek nga nabalhog sa selda sa San Isidro Police Station ang kasuhan og armed robbery, illegal possession of firearms and ammunition og possession of dangerous drugs and drug paraphernalia.
Nasayran nga gigukod sa kapulisan ang grupo sa mga armadong lalaki nga gitudlong responsable sa robbery holdup incident sa usa ka balay sa 4th Street, Manansala Subdivision, Brg.y San Isidro.
Una niini nakadawat og tawag ang kapulisan sa San Isidro alas 7:30 sa gabie gikan sa anak sa nagpangalan og Mclean Sanz Suarez nga gireport nga sila giholdap samtang nanulod sa ilang balay ang mga armadong lalaki.
Miresponde ang patrol team sa City Mobile Force Company og dayong miresonde sa crime scene og namatikdan ang kadudahan nga Mazda pickup nga mibiya sa lugar hinungdan nga gisundan.
Dihang nakapaduol ang grupo sa pickup, kalit nga nagpabuto og armas ang mga suspetsado sa mga pulis nga nagresulta sa mubo nga engkwentro.
Apan nakorner ang mga suspetsado og gipasurender dayon sa kapulisan.
Nasayran nga ang suspetsado nga si Gubantes ang naigo ang kamot atol sa engkwentro.
Positibo usab nga gitudlo sa biktima ang upat ka lalaki nga miholdap sa ilaha.
Narekober sa mga suspetsado ang mga cellphones og uban pang importanteng gamit nga gikuha gikan sa mga biktima.
Nakit-an usab sulod sa sakyanan sa mga suspetsado ang duha ka loaded .38-caliber revolvers, cellphones, 4 ka pakete sa droga og mga drug paraphernalia.
