Upat ka barko sa China ang namatikdan nga misunod sa pinakabag-ong Maritime Cooperative Activity (MCA) sa Pilipinas ug Estados Unidos sa West Philippine Sea, ilabi na sa dapit sa Bajo de Masinloc.
Kini ang unang MCA nga gihimo sa maong lugar sukad nga gikuha ang Chinese floating structure sulod sa bahura, nga kaniadto nahimong kontrobersyal tungod sa gituohang ilegal nga presensya niini.
Sumala sa taho sa Armed Forces of the Philippines (AFP), apil sa mga barko sa China ang duha ka Jiangkai-class frigates, usa ka Jiangdao-class corvette, ug usa ka auxiliary tanker.
Gawas niini, usa usab ka Chinese maritime patrol aircraft ang milupad ibabaw sa maong lugar samtang gihimo ang mga drills. Bisan pa sa presensya sa mga barko sa China, malampuson nga natuman sa AFP ug US forces ang ilang mga gitakdang kalihokan sama sa search-and-rescue operations, visit-board-search-and-seizure drills, ug division tactics.
Ang MCA kabahin sa mas halapad nga Salaknib 2026 joint military exercise nga giapilan sa kapin 7,000 ka mga sundalo gikan sa Pilipinas, Estados Unidos, Japan, New Zealand, ug Australia.
Tumong niini nga mapalig-on ang maritime domain awareness ug interoperability sa mga kaalyadong nasud taliwala sa nagpadayong tensyon sa West Philippine Sea.
Sa pahayag sa AFP, ilang gipasiugda nga legal ang ilang kalihokan ug subay sa international law, ingon man kabahin kini sa pagpatuman sa arbitral ruling niadtong 2016 nga mibasura sa halapad nga pag-angkon sa China sa maong kadagatan.
