Nagpahibalo ang Office of Civil Defense (OCD) nga walay mga timailhan sa kinabuhi taliwala sa 36 ka mga tawo nga missing human sa magnitude 7.8 nga linog nga miigo sa Mindanao niadtong Hunyo 8, 2026.
Sa usa ka press briefing, si OCD Deputy Administrator Assistant Secretary Bernardo Rafaelito Alejandro IV miingon nga base sa mga report gikan sa mga awtoridad, dili klaro kung buhi pa ba ang mga nawala.
Sumala sa OCD, kadaghanan sa mga nawala gituohan nga natabunan sa landslide sa Jose Abad Santos, Davao Occidental, usa sa mga lugar nga grabeng naapektuhan sa linog.
Nagpadayon pa ang mga operasyon sa pagpangita, pagluwas, ug pagkuha, apan giangkon sa mga awtoridad nga lisod ang mga kondisyon sa lugar tungod sa landslide ug delikado nga yuta.
Samtang, ang kumpirmadong ihap sa mga namatay sa kalamidad miabot na sa 65 human upat pa ka mga patayng lawas ang nakit-an gikan sa nahugno nga mga istruktura.
Sumala ni Alejandro, kadaghanan sa mga namatay tungod sa nahulog nga mga debris ug landslide, labi na sa Davao Occidental, Sarangani, ug General Santos City sa South Cotabato.
Base sa pinakabag-ong datos, 176,186 ka pamilya o gibana-bana nga 738,386 ka mga indibidwal ang naapektuhan sa linog.
Sa kini nga gidaghanon, 3,180 ka pamilya o 14,161 ka mga tawo ang kasamtangang nagpabilin sa 37 ka mga evacuation center, samtang ang uban temporaryong nagpuyo uban sa ilang mga paryente ug mga higala.
