GENERAL SANTOS CITY – Miabot na sa halos 40 ka pamilya ang apektado sa paghapak sa dagkong balod gikan sa Sarangani Bay.
Sa record sa City Disaster Risk Reduction and Management Office, gikabutyag nga 38 na ka pamilya ang apektado sa maong panghitabo, kung asa upat panimalay usab sa Prk Pearly Shell, Brgy Bula ang nangaguba human nga kalit midagko ang mga balod ug gipanghapak ang mga balay.
Samtang, misaka matud pa sa 34 ka mga panimalay sa tulo ka purok sa Silway, Brgy Dadiangas West ning siyudad ang nangadaot nga una nang gihapak sa mga dagkong balod kaniadtong Martes.
Kahibaluan nga matud sa Pagasa, ang naasoy’ng panghitabo ang epekto sa LPA nga nahimo nang tropical depression Usman nga nagdala ug mga localized thunderstorms ug mas mikusog ang hangin, hinungdan nga midako ang mga balod sa Sarangani ug gipanghapak ang mga panimalay.
Hinuon, nahatagan na ug hinabang ang mga apektadong pamilya, samtang gitambagan nga dili una mubalik sa mga nadaot nilang panimalay tungod posibleng masubli ang panghitabo.
