GENERAL SANTOS CITY – Miabot na sa 323 ka kaso sa dengue ang natala sa siyudad ning tuiga.
Kini ang gibutyag sa Bombo Radyo GenSan ni Dr. Lalaine Calonzo sa City Health Office, base sa data nga ilang nahipos gikan Enero 1 hangtod Marso 29, 2019.
Matud pa, 66% kini nga mas taas itandi kaniadtong 2018 sa susamang panahon nga may 195 lamang nga natala.
Hinuon, sa karon wala matud pay natala nga namatay tungod sa maong sakit dinhi sa siyudad ning tuiga.
Hinungdan nga padayon ang panawagan sa CHO ngadto sa publiko nga himuon ang mga lakang nga kanunay’ng ginapahinumdum nga unsaon nga makalikay sa maong sakit.
Samtang, sa hisgutanan sa tipdas, nagpadayon matud pa ang pagbakuna sa CHO sa tibuok siyudad.
Matud ni Dr. Calonzo, 89% na ang ilang nabakunahan sa 26 gikan sa 28 ka barangay sa GenSan.
