GENERAL SANTOS CITY – Gipailawom na sa imbestigasyon ang tulo ka tawo nga nasikop sa hiniusang puwersa sa 27th Infantry Battalion Philippine Army, Philippine National Police (PNP)-Special Action Force, South Cotabato-PNP ug Tupi-PNP, sa gipahigayong pag-atake sa kuta sa ISIS (Islamic State of Iraq and Syria)-inspired group sa Purok 1, Barangay Palian sa Tupi, South Cotabato.
Sa impormasyon gikan sa Tupi-PNP, target sa gikasa sa operasyon ang managsuon nga Mohammad Bulacon ug Arafat Bulacon nga mga suspek sa pagpatay kang PO1 Achilles Tablazon kaniadtong Setyembre 16, apan nakaikyas.
Nasikop usab ang amahan nila nga si Akmad Bulacon ug mga igsuon nila nga sila si Zandro ug Mukhtar Bulacon.
Sa naasoy’ng operasyon, narekober ang usa ka bag nga may ISIS flags, mga sangkap sa paghimo ug bomba, mga bala, fragmentation grenade, ug mga motorsiklo.
Sa karon nagpadayon ang paggukod sa mga otoridad sa mga target nga nakaikyas. Kahibaluan nga nagresulta kini ug pagkaalarma sa mga katawhan sa South Cotabato.
