GENERAL SANTOS CITY – Tulo ka mga purok sa Barangay Poblacion Kiamba Sarangani Province ang gipailawom sa lockdown hangtud Mayo uno human nga adunay mga residente nga nagpositibo sa COVID19.
Base sa executive order number 12 nga gipagawas ni Kiamba Mayor Danny Martinez nga walay makagawas gikan sa Purok Baby’s breath kung asa may usa nga nagpositibo, Purok Bougenvilla may duha nga COVID 19 patient, og Purok San Francisco may usa nga natakdan sa sakit .
Nalatid usab sa kamanduan nga bisan pa ang Authorized Person Outside Residence kon APOR og ang pag-abli sa mga gagmay nga tindahan sa nahisgutang mga lugar ang dili usab tugutan.
Hinuon ang mga magpatambal og gikatakdang operahan tungod sa sakit ang tugutan nga makagawas.
Giklaro nga tumong sa maong lakang aron kapugngan ang pagkatag pa sa sakit ingon man aron hatagan usab og dalan ang nagpadayong contact tracing sa mga nataptan sa upat ka mga nagpositibo sa COVID 19 sa maong mga purok.
