Gikumpirma ni Consul General Senen Mangalile sa Philippine Consulate General sa New York nga nakagawas na sa tambalanan ang tulo ka mga Pinoy nga nalambigit sa pagkabangga sa tour bus sa New York sa miaging semana.
Ang tulo ka mga Pinoy pulos overseas Filipino workers (OFWs) sa Qatar apan kasamtangang nagbisita sa US.
Una silang gidala sa usa ka ospital sa Buffalo, New York human sa insidente.
Duha sa mga biktima ang mga lalaki nga parehong nakaangkon og minor injury samtang usa ka babaye ang nakaangkon og samad sa ulo nga giatiman usab dayon.
Matod niya nga sunodsunod nga gipagawas sa ospital ang tulo ug kasamtangang padulong sa New York City, sakay sa bus nga gihatag usab sa tour company.
Samtang, ang konsulado sa New York makigtagbo sa tulo ka mga Pilipino ugmang adlawa, Agosto 26, oras sa Pilipinas.
