Tulo ka tawo ang namatay human malumos sa kusog nga baha nga dala sa low pressure area (LPA) ug Habagat nga nakaapekto sa pipila ka bahin sa Mindanao.
Base sa report sa National Disaster Risk Reduction and Management Council (NDRRMC), ang mga biktima pulos residente sa Barangay Camuayan, lungsod sa Balingasag, Misamis Oriental.
Giingon nga gianod sila sa kusog nga bul-og sa tubig samtang mitabok sa usa ka spillway nga milapas ang tubig tungod sa grabe nga ulan ug dili maayong lakat sa panahon.
Gawas sa mga namatay, mukabat sa 5,156 ka pamilya o 17,516 ka mga tawo gikan sa Regions 3, 7, 9, 10, 11, 12, ug BARMM ang naapektuhan sa maong maut nga panahon.
Tungod sa kadaut, mokabat sa 1,000 ka tawo o hapit 200 ka pamilya ang nagpabilin sa mga evacuation centers.
