Nahimong trahedya ang nahitabong pagpamusil sulod sa San Jose National High School sa Barangay San Jose, Tacloban City, diin tulo ka tawo ang namatay ug lima ang nasamdan.
Sumala sa kapulisan, duha ka menor de edad ang giingong nalambigit sa maong insidente.
Usa kanila ang gilayon nga nadakpan sulod sa eskwelahan, samtang ang ikaduha nakalingkawas apan sa ulahi misurender human nakig-koordenar sa mga awtoridad.
Base sa inisyal nga imbestigasyon, nakita nga ang usa sa mga suspetsado giingong nakasinati og bullying, apan padayon pa gihapon ang imbestigasyon aron matino ang tinuod nga motibo sa luyo sa pagpamusil.
Gidala dayon sa ospital ang mga nasamdan aron matambalan.
Nagdeploy usab og dugang nga pwersa ang Police Regional Office 8 aron masiguro ang kaluwasan ug kahapsay sa maong lugar.
Samtang, suspendido una ang mga klase sa San Jose National High School samtang nagpadayon ang imbestigasyon.
Mipahayag usab og suporta ang Department of Education Regional Office VIII ug mipasalig nga maghatag og psychosocial support sa mga estudyante ug magtutudlo nga naapektuhan sa insidente.
