GENERAL SANTOS CITY – Gikatakda nang mubalik sa Kauluhan ang tulo ka mga miyembro sa Pencak Silat Philippine National Team nga taga GenSan sa umaabot nga Abril 7, 2018.
Kini aron sugdan ang ilang training isip preparasyon sa 2018 Asian Games sa Indonesia.
Sa pakighinabi sa Bombo Radyo kang Precious Jade Borre, gold medalist sa 9th UPSI International Silat Championship 2018 sa Malaysia, ug silver medalist sa nakalabay’ng Asian Games test events kaniadtong Pebrero sa Indonesia, kinahanglan nilang preparahan pagmaayo ang maong kompetisyon.
Kini gumikan makaatbang nila ang mga labing maayong players sa tibuok Asya.
Kahibaluan nga sa Mayo 15 na usab ang pagsugod sa isolation sa mga atleta, kung asa walay tv, cellphone ug bisan unsa mang gadgets.
Ihatag lamang matud pa ang ilang cellphone matag Sabado apan sa Domingo sa hapon kuhaon usab kanila.
Lakip sa training ang target nag pagdagan ug duha ka kilometros sulod sa walo ka minutos. Ang 2018 Asian Games matigayon na sa Agosto 18 hangtod Setyembre 2.
