GENSAN- Napalgan ang patay nga lawas sa usa ka dugong niadtong Sabado, Pebrero 7, sa Sitio Cabo, Barangay Bawing, General Santos City.
Sumala sa pamahayag ni Dr. Roy Mejorada, Senior Ecosystems Management Specialist, nabantayan sa mga mananagat sa may utlanan sa Brgy. Bawing ug Tambler ang usa ka nagluyang dugong nga naglangoy padulong sa Sitio Cabo,Brgy. Bawing.
Gikontak sa mga mananagat ang ilang bay ranger, apan pag-abot sa ilang mga ranger pasado alas 3 sa hapon, anaa na sa baybayon ang dugong ug wala na’y kinabuhi, nga may gitas-on nga 3 meters ug gibug-aton nga gibana-bana nga 400 ngadto sa 500 ka kilo.
Gidala kini sa Marine Wildlife Rescue Center sa Ladol aron masusi, ug napalgan usab ang usa ka full-term nga baby dugong nga may gitas-on nga 94 cm.
Wala pa matino ang eksaktong hinungdan sa kamatayon kay normal ang internal nga organs niini, ug nagkuha na og tissue samples aron isumite sa BFAR alang sa mas lawom nga pag-eksamin.
Gilubong ang inahan sa compound sa Marine Wildlife Rescue Center, ug plano nga kuhaon ang mga bukog niini aron himoong specimen sa educational nga katuyuan, samtang ang baby dugong gipangitaan pa og pamaagi nga ma-preserbar isip intact specimen.
