GENERAL SANTOS CITY – Gikumpirma ni Police Regional Office 12 Director Marcelo Morales nga gi-relieve na ang tulo ka mga pulis nga nangulata ug security guard sa usa ka imnanan sa Koronadal City.
Giila ang mga gireklamo nga pulis nga silang Police Chief Inspector Armando Gallego ug PO3 Edmond Delos Reyes nga managsamang taga-PNP Crime Laboratory, ug si Joven Sumugod nga naka-assign sa Highway patrol Group (HPG 12).
Sa pakighinabi sa Bombo Radyo, gibutyag ni Police Chief Supt. Morales nga base sa nakaabot kaniya nga impormasyon, gustong musaka sa tulo sa second floor aron musulod sa disco bar kaniadtong tungura.
Apan giharang matud pa sila sa nahisgutang gwardiya human nakapkapan nga may armas.
Gihangyo matud pa sila niini ibilin lamang ang mga dala nga armas, apan nasuko hinuon ang tulo ug gipasakitan ang sekyu.
Matud ni Gen. Morales nga nakahinabi na niya ang mga labaw sa nahisgutan ug gikabtyag nga nagpahigayon na usab sila ug imbestigasyon.
Gidis-armahan na matud pa ang duha, samtang ang laing usa ang wala matud pay na-isyuhan ug pusil.
Sa karon ginahulat matud pa ang mamahimong testimonya sa nahisgutang gwardiya, kung asa giawhag kini ni Gen. Morales nga magpasang-at ug kasong kriminal batok sa tulo ka pulis.
Samtang nagpadayon usab matud pa ang imbestigasyon alang sa atubangon nilang kasong administratibo
