Gikompirma sa Department of Migrant Workers (DMW) nga 3 ka mga overseas Filipino workers (OFWs) ang lakip sa namatay sa sunog nga miulbo sa usa ka residential building sa Kuwait niadtong Miyerkules sa buntag.
Matud ni Migrant Worker Secretary Hans Leo Cacdac, 3 ka OFW ang napatay tungod sa nahanggap nga aso.
Ang mga biktima apil sa 11 ka OFW nga nagtrabaho sa samang Kuwaiti construction company nga anaa sa building nga gilamoy sa miulbong sunog.
Sa talaan sa DMW, 2 ka OFW nga anaa sa tambalanan ang nagpabilin sa kritikal nga kahimtang samtang 6 ang luwas ug walay samad.
Samtang, ang mga opisyal sa Pilipinas nakigkontak usab sa tanang pamilya ug kabanay sa 11 ka apektadong OFWs.
Gimanduan usab sa kalihim ang OWWA ug Migrant Workers Office sa Kuwait nga mokooperar sa paningkamot sa PH Embassy sa Kuwait nga mapauli ang patayng lawas sa 3 ka OFWs.
Gipasalig sa kalihim nga ang gobyerno mohatag sa gikinahanglang tabang ug suporta alang sa mga OFWS ug sa ilang mga pamilya subay sa direktiba sa Presidente.
Una sa tanan, sa inisyal nga taho, 49 ka mga tawo ang namatay sa sunog nga niulbo niadtong Hunyo 12 sa edipisyo nga nagsilbi nga dormitoryo sa mga langyaw nga trabahante sa Kuwaiti construction company sa coastal city sa al-Mangaf sa habagatang bahin sa siyudad sa Kuwait.
