Gipasaka sa Department of Justice (DOJ) karong adlawa, Agosto 11, 2026, ang tulo ka counts sa kasong Grave Threats batok kang Vice President Sara Duterte sa Regional Trial Court sa Quezon City.
Apan, gibasura sa DOJ ang reklamo nga Inciting to Sedition nga unang gisumite sa National Bureau of Investigation (NBI) batok kaniya.
Gipahayag sa kampo sa bise presidente, pinaagi sa iyang legal counsel gikan sa Chua Lim & Associates nga si Atty. Paul Lawrence Lim, ang ilang pagsupak sa maong lakang sa DOJ.
Matud ni Lim, gipaabot ug giandam na sa ilang legal team ang posibilidad sa maong desisyon, samtang iyang gipadayag nga ubos sa balaod, nagpabiling inosente ang bise presidente ug misalig sila nga sa ulahi mabasura usab ang mga kaso batok kaniya.
Dugang pa sa abogado nga isip usa ka kasamtangang impeachable officer, dili mahimong kasuhan ang bise presidente kalabot sa giingong probisyon o paglapas nga sakop usab sa kasamtangang impeachment case batok kaniya.
Tungod niini, giingon sa kampo ni VP Sara nga ilang gamiton ang tanang legal remedies nga anaa kanila sa tukmang panahon.
