GENERAL SANTOS CITY – Totally wrecked kon naguba gayud ang usa ka backhoe, samtang laing duha ang pwede pang ipaayo, human maanod miaging gabii sa quarry site sa Silway River sa Brgy San Isidro ning dakbayan.
Ang mga nasampit nga heavy equipment ang ginapag-iyahan ni Manuel Gerlas nga taga Brgy City Heights ning siyudad.
Matud ni PO2 Reneboy Navarro sa TMU, naanod ang nasampit nga tulo ka heavy equipment nga maoy hinungdan sa pagkaguba niini, gawas pa sa usa ka opisina nila nga nabagnos matud pa tungod sa kusog nga tubig.
Matud usab sa tag-iya, mukabat matud pa sa lima ka milyon ka pesos ang kantidad sa damyos niini.
Samtang, mukabat usab sa napulo ka pamilya ang mihikling apan gilayon usab nga gitugtan nga makabalik sa ilang mga pinuy-anan pagkabuntag.
Giklaro ni Dr. Agripino Bong Dacera sa City Disaster Risk Reduction Management Office (CDRRMO), nga una niining gipanhimangnuan ang mga residente duol sa sapa nga mag-amping ug mahimong alerto gumikan sa gilaumang pagbaha.
Sumala pa nga kalit mitaas ang tubig miaging gabii sa Silway River ug mukabat sa 2.5 metros ug miapaw sa gabion dike.
Gikabutyag nga gikan ang tubig sa kabukiran sa Polomolok, South Cotabato nga nakasinati ug sunud-sunod nga mga pag-ulan.
